दाङको तुलसीपुरमा तीन जना सवार मोटरसाइकल रूखमा ठोक्किँदा एक जना किशोरको मृत्यु भएको छ।
आइतबार दिउँसो २ बजे तुलसीपुर उपमहानगरपालिका-४ मा लु .प्र . ०२–००१ प १७१७ नम्बरको मोटरसाइकल अनियन्त्रित भई रूखमा ठोक्किँदा एक जनाको मृत्यु भएको हो।
इलाका प्रहरी कार्यालय तुलसीपुरका प्रहरी निरीक्षक प्रकाश थापाका अनुसार मृतक १६ वर्षीय दीपेन्द्र वली छन्। तुलसीपुर-३ खमारीका वलीको राप्ती प्रदेशिक अस्पतालमा उपचारको क्रममा मृत्यु भएको हो।
दुर्घटनामा मोटरसाइकलमा सवार दुई जना घाइते छन्। तुलसीपुर-४ घोरनेटीका १८ वर्षीय सन्दिप वली र मोटरसाइकल चालक १७ वर्षीय गणेश खड्का घाइते छन्। वली गम्भीर घाइते छन्। उनको घोराहीस्थित राप्ती स्वास्थ्य विज्ञान प्रतिष्ठानमा उपचार भइरहेको छ। खड्काको तुलसीपुर सिटी हस्पिटलमा उपचार भइरहेको छ।
