बाँके, वैशाख १७ – बाँकेको बैजनाथ गाउँपालिका–४, नौलापुरमा ९ वर्षीय बालक कुशल बुढाको हत्या प्रकरणमा उनको आमा यशोदा बुढा र सौतेनी बुबा निरकनाथ योगी संलग्न रहेको खुलेको छ।
प्रहरीका अनुसार कुशलको वास्तविक बाबु को हो भन्ने विषयमा श्रीमान–श्रीमतीबीच विवाद हुँदा आक्रोशमा आएर दुवैले मिलेर कुशलको हत्या गरेका हुन्। शव गत सोमबार कुलोमा गाडिएको अवस्थामा फेला परेको थियो।
कुशल यशोदाको पहिलो श्रीमानबाट जन्मिएका थिए। दोस्रो विवाह लुकाउँदै आएकी यशोदाले विद्यालयमा पनि कुशलको बाबुको नाम फरक उल्लेख गरेकी थिइन्।
हत्या गरेपछि यशोदाले आफैँ छोरा हराएको भनी प्रहरीमा निवेदन दिएकी थिइन्। तर, अनुसन्धानपछि उनीहरूकै संलग्नता पुष्टि भएको हो। दुवैलाई हाल इलाका प्रहरी कार्यालय कोहलपुरमा राखेर अनुसन्धान भइरहेको छ।
