सवारी चालक अनुमतिपत्र (लाइसेन्स) वितरणमा अनियमितता गरेको आरोपमा नेपाल प्रहरीका एक इन्सपेक्टरसहित चार जनाविरुद्ध भ्रष्टाचार मुद्दा दायर भएको छ। 
Commission for the Investigation of Abuse of Authority (अख्तियार) ले हाल कैलालीको इलाका प्रहरी कार्यालय मालारानीमा कार्यरत इन्सपेक्टर पुष्करराज पन्तविरुद्ध मुद्दा दायर गरेको जनाएको छ। पन्त बाँकेको जिल्ला ट्राफिक प्रहरी कार्यालयमा कार्यरत रहँदा नक्कली लाइसेन्स प्रकरणमा संलग्न रहेको आरोप छ।
अख्तियारको छानबिनअनुसार यातायात कार्यालयका कर्मचारीसँग मिलेर लिखित तथा ट्रायल परीक्षामा फेल भएका व्यक्तिलाई पास गराई लाइसेन्स प्रदान गरी लाखौं रुपैयाँ असुली गरिएको खुलेको छ। 
यस प्रकरणमा इन्सपेक्टर पन्तसहित वरिष्ठ सई नन्दकुमार पोखरेल, वरिष्ठ सई प्रबिण आचार्य तथा असई दमन बिक्रम सेनविरुद्ध मुद्दा दायर गरिएको छ। अख्तियारले पन्तविरुद्ध ४३ लाख १४ हजार, पोखरेलविरुद्ध ४७ लाख ६६ हजार, आचार्यविरुद्ध ४१ लाख ३७ हजार र सेनविरुद्ध ३३ लाख ५४ हजार रुपैयाँ बिगो कायम गरेको जनाएको छ। 
गत वर्ष अख्तियारले यातायात कार्यालयका कर्मचारीलाई पक्राउ गरी विस्तृत अनुसन्धान थालेको थियो। पक्राउ परेकाको मोबाइलबाट घुस लेनदेनसम्बन्धी विवरण फेला परेको जनाइएको छ। 
यसै प्रकरणमा आयोगका सहसचिव लोकबहादुर सुनार र उमेश ढुंगानासहित ३३ जनाविरुद्ध समेत मुद्दा दायर गरिएको अख्तियारले जनाएको छ।
अख्तियारले दायर गरेको आरोपपत्रमा लाइसेन्स प्रक्रियामा मिलेमतो र अवैध असुलीको विस्तृत विवरण उल्लेख गरिएको छ।
