सूर्य प्रसाद रिजाल; नेपालगञ्जको पुष्पलाल चोक बसपार्क रोडमा कर्णाली प्रदेश ०२–००१ झ.०१४६ नम्बरको सरकारी गाडीले ट्राफिक नियमको उल्लंघन गर्दै बीच सडकमै पार्किङ गराएको घटनाले चर्चा पाएको छ। उक्त गाडीका चालकले सडक अवरोध गरी स्थानीय यातायातमा समस्या सिर्जना गरेपछि ट्राफिक प्रहरीले तत्काल हस्तक्षेप गर्दै कारबाही गरेको हो।
स्थानीयका अनुसार सरकारी गाडीले यसरी नियम उल्लंघन गर्दा सडक सुरक्षामा प्रतिकूल प्रभाव पर्ने मात्र होइन, सरकारी निकायप्रति नकारात्मक सन्देश प्रवाह हुन सक्छ। सार्वजनिक सेवामा रहेका निकायहरूबाट नै यस्तो लापरवाही देखिनु समाजमा अनुशासन र नियमको पालना गर्ने संस्कृतिमा कमजोर असर पार्न सक्ने विज्ञहरूको भनाइ छ।
सडकमा यस प्रकारको मनोमानीका कारण स्थानीय नागरिकले सरकारप्रति आक्रोश व्यक्त गरेका छन्। “जनताका लागि बनेका नियमहरू पालना गर्न सरकार आफैँ अघि सर्नुपर्छ,” एक स्थानीयले बताए।
सडक सुरक्षालाई मध्यनजर गर्दै ट्राफिक प्रहरीले सरकारी गाडीसमेत नियमको दायरामा ल्याएको यो कदमलाई नागरिकहरूले सराहना गरेका छन्। यस घटनाले सबै तहका चालकहरूलाई ट्राफिक नियम पालनाको महत्त्वबारे थप सचेत गराउने विश्वास लिइएको छ।
यसरी सरकारी निकायका लापरवाहीहरूलाई निरुत्साहित गर्दै, कानूनको पालना र सडक सुरक्षामा सकारात्मक प्रभाव पार्ने काम निरन्तर गरिनुपर्छ।
