बाँके । नेत्र बिक्रम चन्द बिप्लव नेतृत्वको नेपाल कम्युनिष्ट पार्टी (माओवादी) का युवा नेता दिपक बुढाथोकी बाँके क्षेत्र नं. १ बाट प्रतिनिधि सभा सदस्यका लागि प्रत्यक्ष उम्मेदवारका रूपमा चुनावी मैदानमा उत्रिएका छन्। ऊर्जाशील, शिक्षित र परिणाममुखी नेतृत्वको पहिचान बनाउँदै आएका बुढाथोकीलाई आजको पुस्ताले खोजिरहेको वैकल्पिक राजनीतिक नेतृत्वका रूपमा हेरिन थालिएको छ।
लामो समयदेखि सामाजिक न्याय, परिवर्तनकारी राजनीति र जनताको हक–अधिकारको पक्षमा सक्रिय रहँदै आएका बुढाथोकीले विशेषगरी युवा आवाजलाई संसदसम्म पुर्याउने स्पष्ट संकल्पका साथ उम्मेदवारी दिएका हुन्। बेरोजगारी, वैदेशिक पलायन, अवसरको अभाव र पुरानो राजनीतिक संस्कारबाट आजित युवाहरूका लागि उनको उम्मेदवारी नयाँ आशा र विश्वासको केन्द्र बनेको छ।
नेपाल कम्युनिष्ट पार्टी (माओवादी) को तर्फबाट गुलाफ चुनाव चिन्ह लिएर प्रतिस्पर्धामा उत्रिएका बुढाथोकीले युवा शिक्षा, सीप विकास, स्टार्टअप प्रवर्द्धन, स्वदेशमै रोजगारी सिर्जना र उद्यमशीलतालाई आफ्नो प्रमुख एजेन्डा बनाएका छन्।
“युवा शक्तिलाई भाषण सुन्न होइन, निर्णय गर्ने ठाउँमा पुर्याउनुपर्छ,” भन्ने उनको स्पष्ट धारणा छ।
इमानदार, संघर्षशील र जनताको दुःख–सुखमा सधैं साथ दिने नेताका रूपमा परिचित बुढाथोकीलाई पुरानो सोच, शैली र राजनीतिका विरुद्धको बलियो विकल्पका रूपमा समर्थकहरूले विश्वास गरेका छन्। सामाजिक सञ्जाल, युवा संघ–संगठन तथा स्थानीय तहमा उनको पक्षमा समर्थन तीव्र रूपमा बढ्दै गएको देखिन्छ।
“राजनीति पद होइन, जिम्मेवारी हो” भन्ने दृष्टिकोणसहित अघि बढेका बुढाथोकीले बाँके क्षेत्र नं. १ लाई युवा–मैत्री, अवसर–मैत्री र विकास–केन्द्रित क्षेत्र बनाउने अठोट लिएका छन्। उनको उम्मेदवारीले विशेषगरी पहिलोपटक मतदान गर्न लागेका युवामाझ उल्लेखनीय उत्साह थपेको छ।
आगामी निर्वाचनमा बाँके क्षेत्र नं. १ का मतदातालाई गुलाफ चिन्हमा मतदान गरी युवाको आवाज, नयाँ सोच र वास्तविक परिवर्तनको पक्षमा उभिन बुढाथोकीले आग्रह गरेका छन्।
