नेपालगञ्ज, बैशाख ३१ – नेपाल–भारत सीमा नाका क्षेत्रमा आवतजावत गर्दा देखिएको कठिनाइलाई समाधान गर्न नेपालगञ्जका सञ्चारकर्मीहरूले भारतीय सुरक्षाकर्मीलाई सहजीकरणका लागि आग्रह गरेका छन्।
सञ्चारकर्मीहरूले सीमावर्ती क्षेत्रका नेपाली नागरिकहरूलाई दैनन्दिन आवतजावतमा सहजता प्रदान गर्न आवश्यक पहल गर्न आग्रह गर्दै जनस्तरमा बढ्दो असहजतालाई गम्भीरताका साथ लिन सुझाव दिएका हुन्।
सीमा क्षेत्रमा सुरक्षाका कारण देखाइएर हुने अनावश्यक अवरोधले जनजीवन प्रभावित भएको भन्दै सञ्चारकर्मीहरूले दुवै देशका सम्बन्धित निकायहरूबीच समन्वयात्मक कार्यशैली विकास गर्न जोड दिएका छन्।
नेपालगञ्ज नाकाबाट दैनिक रूपमा विद्यालय, व्यापार तथा औषधि उपचारका लागि आवतजावत गर्ने नागरिकहरूलाई समस्या नहोस् भन्ने उद्देश्यले सुरक्षाकर्मीहरूलाई संवेदनशील हुन सुझाव दिइएको हो।
